GALICIA PRESENTE NO EUROPEAN CINEMA AND AUDIOVISUAL DAYS A Axencia Audiovisual Galega estará presente no Foro da Coprodución do European Cinema and Audiovisual Days que se celebra do 18 ao 20 de novembro na cidade italiana de Turín. O principal obxetivo deste foro é identificar e promover o cine e os proxectos audiovisuais de calidade para que poidan participar dos fondos, a financiación e a coprodución das rexións de Europa.  O director xeral do European Cinema and Audiovisual Days, Alessandro Signetto, estendeu tralo seu paso polo Festival de Cine Internacional de Ourense un convite especial á Axencia Audiovisual Galega, que acode a esta edición de 2008 representada por Enrique Nicanor. A misión de ECAD é reunir nun mesmo foro ás institucións e profesionais das rexións e/ou comunidades autónomas de Europa para promoveren e desenvolveren proxectos de coprodución nos que que teñan cabida guionistas, produtores, directores, creativos e distribuidores. Aos participantes ofrécelles un rico programa de conferencias, presentacións, seminarios, casos de estudo e masterclasses para tentar reforzar a colaboración e fomentar o intercambio de experiencias e métodos de traballo así como de facilitar a entrada de profesionais estranxeiros no mercado audiovisual italiano. Este ano, tomando como eixo fundamental a financiación e a xestión de créditos, convidouse entre outros fondos rexionais europeos aos representados nas delegacións de FFF - Film FernsehFonds Bayern, Wien Filmfonds, Rotterdam Film Fund e a Axencia Audiovisual Galega. Para a edición de 2008 agárdase a participación de preto de 400 profesionais, incluíndo alomenos 12 commissioning editors pertencentes aos grupos de traballo das televisións europeas máis importantes e 160 profesionais de 20 países europeos distintos. Espérase que aproximadamente o 25% dos proxectos seleccionados poidan estar en produción nos vindeiros 24 meses e que o 40% dos documentais e proxectos de animación escollidos poidan estar basicamente en fase de finalización nese mesmo periodo de tempo. A sexta edición das xornadas europeas do cinema e o audiovisual complétase coa feira CineShow, a primeira feira de Italia dedicada a equipos profesionais do cine, a televisión e os novos media.