XOCIVIGA 2005

Na presente edición as Xornadas de Cine e Vídeo do Carballiño cumpren xa a súa vixésimo terceira edición.
Desde a súa aparición, proposta polo Director Xeral de Cultura da Xunta de Galicia Luís Alvarez Pousa, por medio do Coordinador da Área Audiovisual da Dirección Xeral Manuel González Álvarez, aos membros do Cineclube Carballiño, naceu coa idea de recuperar un lugar de encontro e posta en común para o movemento audiovisual galego unha vez desaparecidas as Semáns de Cine de Ourense no ano 1978.

A celebración destas Xornadas lévase facendo dunha forma ininterrompida a longo dos anos, nos que contou coa presenza tanto da maior parte das persoas vinculadas ao mundo audiovisual e cultural galego, coma do resto do Estado, mantendo de igual xeito unha especial relación co noso país veciño Portugal.

Na edición actual, para celebrar tan dilatada traxectoria a organización elaborou un interesante programa, onde en verbas da Concelleira de Educación e Cultura Inmaculada Ucha Rodríguez "un ano máis o Carballiño volta a ser o lugar de encontro dos afeccionados ao cine. As Xociviga prenden as cámaras de proxección para facer disfrutarnos coas súas historias e para reunir ás xentes do cine e o vídeo de Galicia e Portugal".

Dentro do programa deseñado destaca sobre todo a presenza do ilustre realizador portugués Manoel de Oliveira, considerado como un dos mestres intiscutibeis e dos cineastas máis lonxevos da cinematografía europea e mundial.

Valentín Barreiros