O Concello de Ourense organiza o “Curso de procesador de catering para persoas dependentes”, dentro do proxecto Auria Inserta - O prazo de inscripción estará aberto entre o 5 e o 15 de xaneiro e as prazas están limitadas a 20 alumnos. A partir do vindeiro mes de xaneiro, dará comezo a impartición do “Curso de procesador de catering para persoas dependentes”, que a Concellería de Economía, Facenda, Emprego e Promoción Económica do Concello de Ourense pon en marcha dentro do proxecto Auria Inserta. O prazo de inscripción para o curso estará aberto entre o 5 e o 15 de xaneiro, ambos inclusive, e as prazas están limitadas a 20 persoas. O obxectivo do curso é capacitar ó alumnado na elaboración de pratos culinarios segundo as necesidades e características das persoas dependentes, tendo en conta os procedementos e normas para acadar obxectivos de rentabilidade e calidade. O curso terá un total de 595 horas, 295 de teoría e 300 horas de prácticas en empresas. Os alumnos que realicen este curso recibirán o Carné de “Manipulador de alimentos” e o título de nivel básico en “Prevención de riscos laborais”. O proxecto Auria Inserta está cofinanciado polo Fondo Social Europeo e ten un orzamento total de 1.785.754 euros, dos que o Concello aporta 375.151 euros. A iniciativa articula un sistema de integración sociolaboral para favorecer o acceso a un posto de traballo a parados de longa duración, víctimas de violencia de xénero, inmigrantes e emigrantes retornados, así como a todos aqueles colectivos que, por cuestión social, cultural ou de xénero presenten dificultades de acceso ó mercado laboral. O curso que dará comezo en xaneiro únese ós cursos que xa están en marcha dende o mes de outubro, o “curso de asistencia sociosanitaria a dependentes en domicilio” e o “curso de asistencia sociosanitaria a persoas en institucións sociais”. A Concellería de Educación abre prazo de matrícula nos cursos de inglés para nenos e adultos da Escola Municipal de Idiomas A Concellería de Educación do Concello de Ourense ten aberto o prazo de matrícula nos cursos de inglés para nenos e adultos da Escola Municipal de Idiomas, nos niveis elemental e avanzado. Tódolos interesados poden matricularse ata o día 30 de decembro nas dependencias da Concellería de Educación, na rúa Ervedelo, número 2, 1º, ou recibir máis información no teléfono 988 510802. As prazas dispoñibles adxudicaranse por orde de presentación de solicitudes.