A Universidade Popular oferta máis de 70 cursos e obradoiros

O Concello de Ourense está a piques de comezar un ano máis unha das actividades cun nivel de participación máis elevado. Despois de superar no pasado curso o millar de inscritos, a Concellería de Educación abre o 1 de outubro o prazo de inscrición para todos os interesados que desexen participar. Á completa oferta de actividades que se ofreceron en edicións anteriores, únense dez novos cursos, como “marketing e publicidade” ou “automaquillaxe”, acadando un total de 72 actividades ofertadas.

A programación de cursos está destinada a tódolos cidadáns interesados maiores de 16 anos, cun custe por curso de 33 euros e un máximo de inscrición en catro cursos por usuario. A Concellería de Educación lembra a tódolos interesados que un dos requisitos máis importantes na selección do alumnado é a orde de inscrición, polo que recomenda realizala o antes posible para garantir a praza.

A formalización da inscrición pódese realizar dende o venres 1 de outubro nas dependencias da Concellería de Educación, na praza de San Martiño. Máis información no teléfono 988 388 136.