Na manifestación máis numerosa que se recorda na cidade.
15.000 persoas de todo tipo e condición manifestáronse en Ourense na tarde do xoves contra os recortes aprobados polo Goberno de Rajoy. Sairon á rúa convocados de maneira unitaria polos sindicatos UGT, CCOO e CIG, pero ademais de sindicalistas e políticos (de PSOE, BNG, EU, CxG ou Anova), desta volta había familias enteiras con nenos pequenos, mozos e maiores, funcionarios, comerciantes ou parados.
Da histórica afluencia de manifestantes a esta convocatoria de protesta dá boa conta o dato de que tres cuartos de hora despois da saída, a manifestación aínda non abandonara o primeiro tramo da rúa Progreso, cando a pancarta inicial xa estaba fronte a Subdelegación do Goberno.
Entre pitos e ao berro de consignas como “dimisión” (das máis coreadas), “e a culpa de quen é? do goberno do PP”, “hai que ilegalizar, o Partido Popular” ou “contra o paro, contra o capital, folga xeral”, a marcha transcurriu pacificamente sen máis incidentes que os ovos, as bolas de pintura e un bote de fume que algúns manifestantes estrelaron contra a fachada da sede do PP.
Hora e media despois do inicio da manifestación, os representantes dos sindicatos interviñan ante os manifestantes para amosar a súa oposición ao plan de axustes aprobado esta semana polo Goberno central.
