Son de Meiga 09 será o festival de referencia este verán cun cartel de primeira
Rosendo, Macaco, Tequila, Mägo de Oz, Mojinos, Reincidentes, Def con Dos, Avalanch e Siniestro tocan o 23, 24 e 25 de xullo no Barco.

Destacadas bandas do panorama estatal e dj’s de sona internacional reuniranse este verán na primeira edición de Son de Meiga 09, que se celebra os días 23, 24 e 25 de xullo no Barco de Valdeorras (Ourense). Rosendo, Tequila, Macaco, Mägo de Oz, Mojinos Escozíos, Reincidentes, Avalanch, Skizoo, Siniestro Total e Def con Dos encabezan un cartel de primeira integrado por preto de 30 grupos e unha vintena de pinchas que garanten unha festa de 72 horas case ininterrompidas.
Esta nova cita na axenda festivaleira convértese así no evento musical de referencia para este verán, segundo destacaron esta mañá os participantes na presentación do evento. No acto estiveron presentes Sabino Guitián e Fran Prada, dous dos hostaleiros organizadores, que deron as claves do proxecto. Alfredo García, alcalde do Barco, felicitou a estes emprendedores e destacou o gran calado da iniciativa, única na comunidade autónoma e o seu contorno. A concelleira de Turismo, Begoña González, subliñou a repercusión que terá na afluencia de visitantes, mentres que Moisés Blanco, vicepresidente e responsable de Xuventude da Deputación Provincial de Ourense, coincidiu en apuntar que nunca na zona se organizara un evento de tal magnitude, que contribuirá a dinamizar a comarca. Á presentación acudiu tamén Andrés Lamosa, responsable de Saraiba Producións.

Son de Meiga é obra de tres hostaleiros da localidade: Fran Prada, Sabino Guitián e José Prada, agrupados en Meigasonora Productions. A iniciativa xurdiu fai un ano, cando o café Despiste e os pubs Sambo e Caos decidiron organizar unha serie de concertos na rúa que colleitaron unha exitosa acollida. Naceu entón a idea de ampliar o proxecto converténdoo nunha gran cita anual, co fin de traer a Galicia bandas punteiras da escena española e promocionar á vez aos grupos e dj’s do contorno. Para esta primeira edición de Son de Meiga, que non será a última, contan coa produtora Saraiba e a colaboración da Concellería de Turismo de O Barco de Valdeorras e da Deputación de Ourense.

Grupos locais e dj’s internacionais
Xunto as bandas de renome, tocarán grupos menos coñecidos pero de notable calidade, a meirande parte procedentes de distintos lugares da comunidade autónoma e da comarca do Bierzo, aínda que tamén doutros puntos do Estado. Actuarán Navegando a Barlovento, Amadeüs, Cuentaatrás, Jabón Blue, Hastilla, Mala Komunikacion, Cabo da Vila, M’82, Aztor Secundario, Discordia, Vuelta y Media, Por Placer, Crakerman, Iria Flavia, Os Cuchufellos, La Tuna Rastafari e Esquíos. A música empezará a soar a media tarde, aínda que os pratos fortes serviranse entre as 22 horas e as 3 da madrugada. O rock vai ser o estilo predominante, pero tamén se escoitarán sons mestizos, heavy metal, ska e folk, entre outros.
O cartel complétase con dj’s da talla dos brasileiros Pet Duo ou o serbio Dejan Milicevic, aos que se suman nomes non menos internacionais como Dj Tako, Reeko, Cora Novoa, David Mallada, Raúl Mezcolanza, Aitor Ronda, Adrián Arias, Trevor Rockliffe, Fatima Hajjl, Darkrow, C-System, Óscar, iL Kartone e David Prada. Todos eles suman entre os tres días máis de 30 horas de sesións dj que prolongarán a festa ata o domingo a mediodía.

Entradas xa á venda con desconto
As entradas para o festival Son de Meiga 09 están xa á venda, con notables descontos para o bono de tres días, que custa 65€ nos locais dos organizadores, 75€ en Tick Tack Ticket (www.ticketmaster.es) e centros asociados (Carrefour, FNAC, Gong, Tipo, etc.) e 90€ no despacho de billetes. A entrada individual por día ten un prezo de 30€ na rede TTT e 35€ no despacho de billetes. Existe unha promoción de 1.000 bonos a 60 €, dos cales 500 venderanse a través da rede Tick Tack Ticket, mentres que os outros 500 poderanse adquirir nos establecementos da organización: Pub Caos, Cafetería Despiste e Pub Sambo, todos eles na rúa Abdón Blanco, do Barco.

Son de Meiga 09 contará con tres escenarios no parque empresarial da Raña, dous nos que se alternarán as bandas para que a música no descanse e un terceiro onde pincharán os dj’s. Instalarase unha gran potencia de luz e son que impulsarán ao máximo a forza das actuacións. Os asistentes dispoñen ademais dunha zona de acampada gratuíta nas proximidades da área de concertos dotada con todos os servizos e están a estudarse colaboracións cos hoteleiros do municipio. Distintos concellos da comarca colaborarán na dotación dun servizo especial de autobuses nesas datas para que os mozos eviten coller o coche.